საქართველოს საგარეო საქმეთა მინისტრის მოადგილემ, ხათუნა თოთლაძემ მონაწილეობა მიიღო გაეროს უშიშროების საბჭოს მაღალი დონის დებატში განვითარებადი ტექნოლოგიებისა და საზღვაო უსაფრთხოების შესახებ
2026 წლის 29 ოქტომბერს, საქართველოს საგარეო საქმეთა მინისტრის მოადგილემ, ხათუნა თოთლაძემ მონაწილეობა მიიღო გაეროს უშიშროების საბჭოს მაღალი დონის დებატში, რომლის ფარგლებშიც განხილულ იქნა განვითარებადი ტექნოლოგიებისა და საზღვაო უსაფრთხოების საკითხები.
სიტყვით გამოსვლისას, მინისტრის მოადგილემ ხაზი გაუსვა შავი ზღვის რეგიონის უსაფრთხოების მნიშვნელობას საერთაშორისო ვაჭრობის, ენერგეტიკული უსაფრთხოებისა და ეკონომიკური განვითარებისათვის. მან ყურადღება გაამახვილა რუსეთის მიერ საქართველოს აფხაზეთისა და ცხინვალის რეგიონების ოკუპაციითა და უკრაინის წინააღმდეგ მიმდინარე აგრესიით შექმნილ გამოწვევებზე, რომლებიც საფრთხეს უქმნის რეგიონულ სტაბილურობასა და საზღვაო უსაფრთხოებას.
ხათუნა თოთლაძემ ასევე ისაუბრა თანამედროვე ტექნოლოგიების მზარდ როლზე საზღვაო უსაფრთხოების სფეროში და აღნიშნა, რომ ხელოვნური ინტელექტის, მონიტორინგის თანამედროვე სისტემებისა და უპილოტო ტექნოლოგიების განვითარებასთან ერთად აუცილებელია შესაბამისი უსაფრთხოების მექანიზმების, ეფექტიანი ზედამხედველობისა და ანგარიშვალდებულების უზრუნველყოფა.
მინისტრის მოადგილემ ყურადღება გაამახვილა საქართველოს მიერ საზღვაო უსაფრთხოების შესაძლებლობების გაძლიერების მიზნით გადადგმულ ნაბიჯებზე, მათ შორის, საერთაშორისო პარტნიორებთან თანამშრომლობის მნიშვნელობაზე. მან ხაზი გაუსვა ნატოსთან თანამშრომლობას და საქართველოს წვლილს საერთაშორისო საზღვაო უსაფრთხოების განმტკიცებაში.
გამოსვლის დასასრულს, ხათუნა თოთლაძემ აღნიშნა, რომ გაერო და სხვა საერთაშორისო მექანიზმები მნიშვნელოვან როლს ასრულებენ ამ მიმართულებით საერთო მიდგომებისა და ეფექტიანი თანამშრომლობის ხელშეწყობაში. მან კიდევ ერთხელ დაადასტურა საქართველოს მზადყოფნა, განაგრძოს პარტნიორებთან კოორდინირებული მუშაობა უსაფრთხო და სტაბილური საზღვაო გარემოს უზრუნველსაყოფად.